Vishnu Shatpadi Stotram in English
avinayamapanaya viṣṇō
damaya manaḥ śamaya viṣayamr̥gatr̥ṣṇām |
bhūtadayāṁ vistāraya
tāraya saṁsārasāgarataḥ || 1 ||
divyadhunīmakarandē
parimalaparibhōgasaccidānandē |
śrīpatipadāravindē
bhavabhayakhēdacchidē vandē || 2 ||
satyapi bhēdāpagamē
nātha tavā:’haṁ na māmakīnastvam |
sāmudrō hi taraṅgaḥ
kvacana samudrō na tāraṅgaḥ || 3 ||
uddhr̥tanaga nagabhidanuja
danujakulāmitra mitraśaśidr̥ṣṭē |
dr̥ṣṭē bhavati prabhavati
na bhavati kiṁ bhavatiraskāraḥ || 4 ||
matsyādibhiravatārai-
-ravatāravatāvatā sadā vasudhām |
paramēśvara paripālyō
bhavatā bhavatāpabhītō:’ham || 5 ||
dāmōdara guṇamandira
sundaravadanāravinda gōvinda |
bhavajaladhimathanamandara
paramaṁ daramapanaya tvaṁ mē || 6 ||
nārāyaṇa karuṇāmaya
śaraṇaṁ karavāṇi tāvakau caraṇau |
iti ṣaṭpadī madīyē
vadanasarōjē sadā vasatu || 7 ||
iti śrīmatparamahaṁsaparivrājakācāryasya śrīgōvindabhagavatpūjyapādaśiṣyasya śrīmacchaṅkarabhagavataḥ kr̥tau ṣaṭpadī stōtraṁ sampūrṇam |
Click to join Bhaktinidhi on Whatsapp